Í fyrri tilkynningu félagsins var ósamræmi á milli talna í umfjöllun um áætlun 2026 í tilkynningunni sjálfri og stjórnendauppgjöri sem fylgdi með. Tölur hafa verið leiðréttar í neðangreindri tilkynningu en upplýsingar í stjórnendauppgjöri eru óbreyttar.

Rekstur Eikar fasteignafélags („Eik“ eða „félagið“) gekk vel á árinu 2025 og hélt kröftugur vöxtur í tekjum og EBITDA sér í takti við áætlanir. Samkvæmt stjórnendauppgjöri nam EBITDA ársins 7.901 m.kr. og jókst hún um 7,6% á milli ára.

Helstu niðurstöður stjórnendauppjörs fyrir árið 2025 eru:

• Rekstrartekjur námu 12.586 m.kr.
• Leigutekjur námu 10.865 m.kr.
• Rekstrarhagnaður fyrir matsbreytingu og afskriftir nam 7.901 m.kr.
• Matsbreyting fjárfestingareigna nam 5.352 m.kr.
• Söluhagnaður fjárfestingareigna nam 134 m.kr.
• Handbært fé frá rekstri nam 4.962 m.kr.
• Bókfært virði fjárfestingareigna nam 172.760 m.kr.
• Skuldsetningarhlutfall (nettó vaxtaberandi skuldir / virði fasteigna, lóða og byggingarheimildina) nam 58,9%.
• Virðisútleiguhlutfall nam 94,7%.
• Vaxtaberandi skuldir námu 104.210 m.kr.
• Vegnir verðtryggðir vextir fjármögnunar félagsins námu 3,71%.
• Vegnir óverðtryggðir vextir fjármögnunar félagsins námu 9,55%.

Eik fékk Festingu hf. afhent seinni part desember mánaðar, en fasteignir Festingar eru um 43.000 fm. að stærð og hýsa starfsemi Samskipa hf. á Íslandi. Heildarvirði Festingar í kaupunum (e. Enterprice Value) var 15.070 m.kr. Félagið nýtti efnahagsreikning fjármagnaði kaupin að fullu með yfirtöku lána og nýrri bankafjármögnun. Við kaupin hækkuð fjármögnunarkjör félagsins lítillega, en félagið nýtti sveigjanlegar fjármögnunarleiðir við kaupin.  Kaupin styrkja tekjugrunn Eikar með 20 ára verðtryggðum samningnum, en ekki er gert ráð fyrir auknum rekstrarkostnaði félagsins vegna kaupana.

Handbært fé frá rekstri nam 4.962 m.kr. á árinu. M.v. niðurstöðu stjórnendauppgjörs og að teknu tilliti til arðgreiðslustefnu félagsins má vænta að tillaga um arðgreiðslu vegna ársins 2025 verði u.þ.b. 1,1 kr. pr útistandandi hlut samanborið við 1,0 kr. pr. hlut vegna ársins 2024.

Áætlun ársins 2026

Eik spáir áframhaldandi kröftugum vexti leigutekna og EBITDA eftir stækkun eignasafnsins með kaupum á Festingu hf.

Hér koma upplýsingar um helstu stærðir úr áætlun félagsins á föstu verðlagi miðað við vísitölu neysluverðs í janúar 2026:

• Rekstrartekjur á bilinu 14.250 – 14.800 m.kr.
• Leigutekjur á bilinu 12.530 – 13.040 m.kr.
• EBITDA á bilinu 9.000 – 9.360 m.kr.
• Fjárfestingar í núverandi eignum og eignfærðar endurbætur á bilinu 2.500 – 3.000 m.kr.
• Gjaldfært viðhald um 280 m.kr.
• Virðisútleiguhlutfall 94,5 – 95,5% í lok árs 2026.

Í meðfylgjandi kynningu eru frekari upplýsingar um stjórnendauppgjör Eikar og forsendur áætlunar vegna ársins 2026. Vakin er athygli á að um er að ræða óendurskoðað stjórnendauppgjör sem kann að taka breytingum fram að birtingu ársuppgjörs og ársskýrslu félagsins þann 12. mars nk.

Kynningarfundur

Opinn kynningarfundur fyrir markaðsaðila verður haldinn föstudaginn 6. febrúar 2026 klukkan 8:30 á skrifstofu félagsins á 18. hæð í Smáratorgi 3, Kópavogi. Boðið verður upp á léttan morgunmat frá kl. 8.00.

Hreiðar Már Hermannsson, forstjóri og Lýður H. Gunnarsson, framkvæmdastjóri fjármálasviðs, munu kynna stjórnendauppgjörið og svara spurningum að lokinni kynningu.

Fundinum verður einnig streymt á netinu og fer skráning á rafræna fundinn fram hér: https://vimeo.com/event/5695935/2bc58dfe57/register

Nánari upplýsingar veita:

Hreiðar Már Hermannsson, forstjóri, [email protected],  s. 856-5907
Lýður H. Gunnarsson, framkvæmdastjóri fjármála og UT, [email protected] s. 820 8980