Lykilstærðir 

Allar fjárhæðir í evrum og samanburðartölur í sviga.

• Rekstrartekjur ársfjórðungsins voru 97,3 m€ (90,0 m€).
• EBITDA af reglulegri starfsemi á ársfjórðungnum var 11,3 m€ (11,3 m€).
• Hagnaður tímabilsins nam 4,1 m€ (2,8 m€).
• Heildareignir voru 565,7 m€ (547,5 m€ í lok 2025).
• Vaxtaberandi skuldir voru 217,1 m€ (211,4 m€ í lok 2025).
• Handbært fé var 23,4 m€ (26,4 m€ í lok 2025).
• Eiginfjárhlutfall var 48,5% (49,4% í lok 2025).
  
  

Rekstur

Rekstrartekjur samstæðunnar voru 97,3 m€ og hækkuðu um 8,1% frá fyrstu þremur mánuðum fyrra árs.

EBITDA félagsins hækkar lítillega milli tímabila og nemur hækkunin um 0,3% og er 11,3 m€ á fyrstu þremur mánuðum ársins 2026 líkt og hún var á fyrstu þremur mánuðum ársins 2025.

Gengishagnaður fyrstu þrjá mánuði ársins nam 0,8 m€ samanborið við gengistap að fjárhæð 1,0 m€ á sama tímabili í fyrra.

Hagnaður á fyrstu þremur mánuðum ársins af áframhaldandi starfsemi eftir skatta nam 4,1 m€ en 3,0 m€ á sama tímabili í fyrra.

Eins og áður hefur komið fram í tilkynningum frá félaginu þá endurskipulagði félagið hluta af framleiðslustarfsemi sinni á síðasta ári. Félagið fór því með starfsemi þessara félaga sem aflagða starfsemi í samræmi við reikningsskilareglur og allur rekstur aflagðrar starfsemi er sýndur í sér línu í rekstrarreikningi félagsins undir liðnum aflögð starfsemi eftir skatta. Samanburðartölum síðasta árs hefur verið breytt í samræmi við þessa flokkun. Afkoma aflagðrar starfsemi á fyrstu þremur mánuðum þessa árs er engin á rekstur félagsins en var neikvæð um 0,1 m€ fyrir sama tímabil í fyrra.

Hagnaður tímabilsins nemur 4,1 m€ en var 2,8 m€ á sama tímabili ársins 2025.

Efnahagur

Heildareignir voru 565,7 m€ og hafa hækkað úr 547,5 m€ í árslok 2025.

Eigið fé nam 274,6 m€, en af þeirri upphæð eru 16,6 m€ hlutdeild minnihluta í eigin fé dótturfélaga.

Hlutfall eigin fjár, þegar hlutdeild minnihluta er meðtalin, var í lok tímabilsins 48,5% af heildareignum samstæðunnar en var 49,4% í árslok 2025.

Vaxtaberandi skuldir námu í lok tímabils 217,1 m€ samanborið við 211,4 m€ í árslok 2025.

Viðskiptaskuldir og aðrar skammtímaskuldir í lok tímabilsins nema 63,3 m€ en námu 56,4 m€ í árslok 2025. Hækkun má einkum rekja til hærri birgðastöðu einkum vegna tilflutnings á framleiðslu til Indlands og aukningar á viðskiptakröfum vegna aukinnar sölu í lok tímabilsins.

Samandregni árshlutareikningurinn er aðgengilegur á heimasíðu Hampiðjunnar hf., www.hampidjan.is

Í dag verður haldin fjárfestakynning kl. 16:15 í höfuðstöðvum félagsins að Skarfagörðum 4. Kynningunni verður jafnframt streymt og er streymið aðgengilegt á heimasíðu félagsins, https://hampidjan.is/fjarmal/streymi

Hjörtur Erlendsson, forstjóri:

“Salan á fyrsta fjórðungi þessa árs varð um 97,3 m€ samanborið við 90,0 m€ í fyrra eða söluaukning um rúmlega 8,1%. Þessi söluaukning kemur til þrátt fyrir mikinn samdrátt í veiðarfærasölu á þessum fyrsta ársfjórðungi með aukinni sölu til fiskeldis ásamt aukinni sölu til útsjávariðnaðar og einnig vegna þess að Kohinoor á Indlandi kemur nú að fullu inn.

Frá og með þessum fyrsta ársfjórðungi er tekin upp ný starfsþáttaskilgreining sem sýnir mun skýrar meginstarfsþætti samstæðu Hampiðjunnar og auðveldar samanburð á milli ára. Starfsþættirnir eru nú fjórir; móðurfélag og framleiðsla, veiðarfæri, fiskeldi og útsjávariðnaður.

Þar má sjá að sala á veiðarfærum hefur dregist saman um 9,5 m€ (17%) meðan sala til fiskeldis hefur aukist um 8,1 m€ (32%) og útsjávariðnaður jókst um 1,7 m€ (58%). Framleiðsluhlutinn jókst um 7,4 m€ (44%) en þar verður að hafa í huga að milliviðskipti eru töluverð því sá hluti selur bæði beint til endanlegra kaupenda og til systurfyrirtækja í samstæðunni.

Þegar grannt er skoðað eru fjórar meginskýringar á söluaukningunni. Fyrst ber að nefna meiri sölu til fiskeldis í kjölfar sameiningar þeirra þriggja fyrirtækja Hampiðjunnar sem sinntu fiskeldi í eitt fyrirtæki sem nefnist ELDI og tók formlega til starfa um áramótin. Í öðru lagi þá færðist staðan í Bandaríkjunum í sitt fyrra horf eftir mikinn samdrátt í veiðarfærasölu á fyrri hluta síðasta árs. Sá samdráttur kom til vegna lágs verðs á alaskaufsa sem varð til þess að útgerðarfyrirtæki héldu að sér höndunum og lágmörkuðu öll sín útgjöld fram á sumarið í fyrra. Í þriðja lagi þá voru góðar sölur á ofurstroffum til uppsetningar á vindmyllum og í fjórða lagi kemur Kohinoor á Indlandi að fullu inn, en gengið var frá kaupum á 75,1% meirihluta í byrjun febrúar í fyrra og í ár er því sala Kohinoor í janúar að bætast við á þessum ársfjórðungi.

Framleiðslukostnaður, hráefni og vinnulaun, hækka minna en sem nemur söluaukningunni eða um 6,0% sem er jákvætt en á móti kemur að rekstrarkostnaður eykst um 18,0% en þar munar mest um hærri kostnað tengdan fiskeldi ásamt innkomu Kohinoor.

EBITDA á þessum fyrsta ársfjórðungi er eilítið hærri en á sama ársfjórðungi í fyrra og er nú 11.318 þús.€ (11,6%) samanborið við 11.289 þús.€ (12,5%) árið áður.

Fjármagnsliðirnir voru óhagstæðir á síðasta ári og þar munaði mest um gengismun og minni fjáreignatekjur eftir að kaupin á Kohinoor voru að mestu fjármögnuð með innistæðum á krónureikningum með góða ávöxtun. Nú eru vaxtatekjur og vaxtagjöld í meira jafnvægi og jákvæð sveifla í gengismun á milli þessara ársfjórðunga er um 1,8 m€.

Hagnaður eftir skatta og færslu vegna aflagðrar starfsemi 2025 er nú 4,1 m€ á móti 2,8 m€ í fyrra.

Samdráttur í veiðarfærasölu kemur ekki á óvart og hefur verið viðvarandi frá síðastliðnu hausti þegar tilkynnt var um kvótaniðurskurð í makríl og kolmunna. Eftir ráðgjöf alþjóða hafrannsóknarráðsins (ICES) og samninga þeirra þjóða sem veiða úr uppsjávarstofnunum má búast við að makrílveiði minnki um 48% frá síðasta ári og kolmunnaveiði um 41%. Þessi samdráttur hefur haft þau áhrif að útgerðarfélög halda að sér höndum í nýfjárfestingum og nýta betur þau veiðarfæri sem útgerðirnar eiga.

Minnkandi þorskkvóti í Barentshafi hefur einnig haft töluverð áhrif á sölu veiðarfæra einkum í N-Noregi. Þar hafa kvótar verið skornir umtalsvert niður síðustu ár og hafa ekki verið lægri síðan 1991. Það er búist við því að kvóti þar muni fara að hækka aftur á næstu árum þar sem nýliðun virðist vera að batna. Takmarkanir ESB á sölu til rússneskra útgerða, sem koma inn til Noregs að landa sínum afla úr sameiginlegum veiðistofni Rússlands og Noregs í Barentshafinu, hafa einnig haft mikið að segja og dregið úr sölumöguleikum.

Það er þó ekki niðurskurður í öllum kvótum því síldarkvótinn við N-Noreg var aukinn um 33% og ýsukvótinn í Barentshafi um 18% en veiði á þessum tegundum hefur minni áhrif á veiðarfærasölur en hinar tegundirnar.

Það má búast við að minni veiðikvótar munu draga eitthvað úr sölu flottrolla á komandi misserum og því er nauðsynlegt að sníða stakk eftir vexti hjá þeim fyrirtækjum sem framleiða veiðarfæri fyrir þá stofna sem niðurskurðurinn nær til. Mikilvægt er að hafa í huga að aðrir veiðistofnar við N-Atlantshafið eru í jafnvægi og stór hluti af sölu veiðarfærafyrirtækjanna tengist botntrollum, t.d. fyrir þorsk, ýsu og rækju.

Góð loðnuvertíð í vetur skilaði sér vel til íslenskra útgerða og notkun á nótum, sem hefur verið lítil undanfarin tvö ár í loðnuleysinu, skapar töluverð verkefni hér á landi, sérstaklega í sumar og haust þegar farið er yfir næturnar fyrir næstu vertíð.

Verkefnastaða í efnum til veiðarfæraframleiðslu er hins vegar í lagi þrátt fyrir samdrátt í veiðarfærasölu í byrjun ársins. Búast má við að biðlistar eftir netum og köðlum styttist en þó ekki þannig að framleiðsla minnki fram á sumar.

Ein ástæða þess að framleiðsla á veiðarfæraefnum helst í horfinu, þrátt fyrir sölusamdrátt í veiðarfærum, er að ný fyrirtæki innan samstæðunnar eru að flytja sín innkaup frá utanaðkomandi birgjum til eigin framleiðslufyrirtækja Hampiðjunnar, Hampidjan Baltic í Litháen og Kohinoor á Indlandi.

Þrátt fyrir deyfð á veiðarfæramörkuðum hefur ekkert verið slegið af í vöruþróun og þar eru helst tvær nýjungar sem unnið er að.

Annað er þróun á flottrollum til að létta þau í drætti svo auka megi toghraðann og með því ná meiri afla á togtíma og ná stærri fiski sem er sprettharðari. Það er gert með að skipta út efnum fremst í flottrollunum með ofurefnum sem eru sterkari og grennri og veita minni mótstöðu í drætti. Þessi gerð trolla hefur nafnið Helix Robus en Robus er einmitt vöruheitið fyrir hagkvæmustu gerðina á ofurtógum sem Hampiðjan Baltic framleiðir.

Hin varan sem lögð hefur verið mikil áhersla á að þróa undanfarna mánuði er Flow Gear en það er búnaður sem kemur í stað þungrar gúmmílengju sem kallast rockhopper og er neðst og fremst á botntrollum. Flow Gear byrjaði í þróun hjá Mørenot í Noregi en þróunarferlinu er að ljúka hjá Hampiðjan Ísland og nú má segja að ferlinu sé lokið og varan fullbúin til sölu.

Stofnun ELDI um áramótin er að skila þeirri samræmingu, samlegð og samtakamætti sem vonast var eftir en vissulega er mikið verk enn óunnið varðandi frekari hagræðingu og flutninga á framleiðslunni til Indlands.

Hagræðingaraðgerðir síðasta árs, sérstaklega lokun Mørenot Danmark í Danmörku og Poldan í Póllandi, munu styrkja reksturinn á þessu ári. Áfram er unnið að hagræðingaraðgerðum í Noregi í kjölfar stofnunar Eldi sem munu lækka kostnað þegar líður á árið og að fullu á næsta ári.

Verkefnastaðan í fiskeldiskvíaframleiðslu er góð fram á mitt sumar í Litháen en þar eru enn tvö fyrirtæki sem sinna því, Eldi Baltic og Vonin Lithuania.

Mikið er að gera hjá Kohinoor í framleiðslu á fiskeldiskvíum og afkastagetan er bókuð fram í september. Til að anna öllum verkefnum þá hefur verið tekinn á skammtímaleigu stór vinnusalur til viðbótar við núverandi netaverkstæði og starfsmönnum fjölgað umtalsvert. Þar er einnig verið að þjálfa starfsmenn til að taka við þeirri framleiðslu sem nú er í Evrópu og mun flytjast til Indlands í haust.

Áfram er gott útlit með sölu á fiskeldisbúnaði næstu misseri, sérstaklega í stífu HDPE (High Density PolyEthylene) fiskeldiskvíum en þær eru allar framleiddar hjá Kohinoor á Indlandi.

Efni úr hnútalausu nyloni, sem er framleitt hjá Hampidjan Baltic, ásamt saumavélum er komið til Kohinoor. Þjálfun starfsmanna Kohinoor er að hefjast og þeir starfsmenn munu síðan starfa í Auric þegar 28.000 m² netaverkstæðið, það stærsta í heimi, verður tilbúið til notkunar.

Vöruþróun fyrir fiskeldi heldur markvisst áfram og nú undir merkjum ELDI. Þar er aðallega unnið að fjórum verkefnum, Marwall sem er hálflokuð kví með dælubúnaði til að dæla sjó af dýpi og blanda í hann súrefni, Mardeep sem er niðursökkvanleg kví, Flexipen sem er flothringur í einingum sem hægt er að setja saman á þeim stað sem kvíin er staðsett en í dag eru plaströrahringirnir settir saman á landi og síðan dregnir út að kvíastæðinu. Það sem einna mesta athygli hefur vakið er kerfið BioSeize sem er til að safna saman lífrænum úrgangi frá fiskeldiskvíum og dæla honum varlega upp á yfirborðið til að koma í veg fyrir að hann molni niður. BioSeize samanstendur af ConeCollect sem er keilulaga net til að safna úrganginum saman og Fish/It sem er dælukerfið.

ELDI og Rotor Systems stofnuðu saman fyrirtækið Rotor Aqua í byrjun þessa árs til að þróa og framleiða Fish/It og byggir það á sameiginlegri vöruþróun fyrirtækjanna undanfarin tvö ár.

Eftir framleiðslu og afhendingu á stórri pöntun af ofurstroffum, fyrir uppsetningu á vindmyllum, nú í mars þá er biðstaða eftir nýjum pöntunum til framleiðslu. Verið er að vinna að því að klára samninga um afhendingu í ný verkefni fyrir sama viðskiptavin.

Unnið er að öðrum samningum um verkefni í framleiðslu á ofurtógum og ofurstroffum fyrir olíuiðnað og í djúpsjávarverkefni, sem koma væntanlega til framleiðslu og afhendingar í haust og fram á næsta ár. Markaðurinn fyrir ofurstroffur einkennist af frekar fáum en stórum lyftiverkefnum sem fáir stórir verktakar sinna hér í Evrópu. Útlitið er gott fyrir árið í heild en verkefnastaðan getur sveiflast mikið milli mánaða og ársfjórðunga vegna eðlis markaðsins.

Slitbekkurinn, sem gefur 2.000 tonna átak og getur álagsprófað stroffur upp að 104 m, var settur upp utandyra við Hampidjan Baltic síðastliðið sumar eins áður hefur komið fram. Fyrirhugað er að flytja slitbekkinn inn í aðalbygginguna í haust þegar pláss losnar við flutning á vélum frá Litháen til Kohinoor á Indlandi.

Hráefnisverð, sérstaklega polyethylen og nylon, hafa hækkað mikið frá innrásinni í Íran en engin vandamál hafa hins vegar verið með framboð á efnunum. Þegar hráefnaverð hækkar skyndilega eins og nú hefur gerst, en ekki búist við að hækkunin vari lengi, þá er lagt á hráefnisgjald sem nemur hækkuninni og henni þannig velt út í verðlagið. Orkuverð í Litháen, rafmagn og gas, er í jafnvægi.

Uppbyggingin á iðnaðarsvæðinu Auric er í fullum gangi en þar er verið að byggja samtals 59.200 m² viðbót fyrir framleiðslu Kohinoor á netum og fiskeldiskvíum. Núverandi byggingar félagsins eru samtals 56.476 m² svo um er að ræða rúmlega tvöföldun á húsnæði Kohinoor.

Byggingarvinnan virðist vera einhverjum vikum eftir áætlun en engu að síður útlit fyrir að það verði hægt að flytja framleiðslu á netum og samsetningu á fiskeldiskvíum til Indlands í haust eins og til stóð. Þessi tilflutningur á framleiðslunni skiptir miklu máli til að hámarka framleiðsluhagkvæmni og tryggja mikla afkastagetu í fiskeldisbúnaði og veiðarfæragerð. Þessi breyting hefur einnig í för með sér að það opnast möguleikar á frekari hagræðingu í Evrópu og með því styrkja rekstur samstæðu Hampiðjunnar enn frekar.”